Baahi ba Palm Ridge ba fumana Mangolo a Tlotlo
Toropokgolo ya Ekurhuleni mmoho le Lefapha la Matlo la Gauteng le fane ka mangolo a tlotlo a fetang palo ya 300 ho setjhaba sa Palm Ridge ka Labohlano la 31 Hlakubele.
Given Sithole ya dilemo di-48 moahi wa Palm Ridge Ext 9 le ya amohetseng lengolo la setsha o ile a sitwa ho ithiba thabong ya hae ha a fumana tiisetso ya hore ke mong’a ntlo.
“Joaloka hlooho ya lelapa ke boikarabello ba ka ho etsa bonnete ba hore lelapa la ka le na le sebaka seo le ka se bitsang lehae. Re na le dilemo tse-23 re lula ntlong ena ya RDP le mosali wa ka le bana ba bararo ‘me kajeno ke na le bonnete ba hore lehae la bona,” ho boletse Sithole ya thabileng.
Nakong ya mokete wa ho fana ka lengolo la setsha, diofisiri di khothaleditse beng ba matlo ho lebela ditokomane tsa bona kaha di ka sebetsa e le thepa e hlahisang maruo ‘me e ka sebediswa e le tebeletso ha ba etsa kopo ya dikadimo tsa ho lefella sekolo kapa ho fumana dikadimo tsa banka.
Ho na le ditokomane tse ka bang 2000 tse seng di tla fetisetswa ho beng ba matlo ba molaong ba Palm Ridge Extensions 1-9.
Ho lebelletsoe hore ditokomane tse 9 000 tse matsohong a lefapha la phalliso ya batho di tla fetisetswa ho beng ba tsona leetong la ntlo le ntlo ke dihlopha tsa bacha e le ho netefatsa hore ditho tsa sechaba di fuwa bopaki ba tsona.
